July 16, 2024, Tuesday
२०८१ श्रावण १, मंगलवार
एमाले कपुरकोटको संकल्पः मगर संग्राहलय देखि जेष्ठ नागरिक मिलन केन्द्र र आवासिय विद्यालय निर्माण

एमाले कपुरकोटको संकल्पः मगर संग्राहलय देखि जेष्ठ नागरिक मिलन केन्द्र र आवासिय विद्यालय निर्माण

१२ बैशाख ,सल्यान।
नेकपा एमाले कपुरकोटले स्थानीय तह निर्वाचनका लागि संकल्प पत्र सार्वजनिक गरेको छ ।

उम्मेदवारहरुको मनोनयन दर्ताको दिन एमाले कपुरकोट गाउँपालिका कमिटीले संकल्प पत्र सार्वजनिक गरेको हो ।

संकल्प पत्रमा मगर संग्राहलय निर्माण संगै जेष्ठ नागरिक मिलन केन्द्र र आवासिय विद्यालय निर्माण गर्ने प्रतिबद्धता एमालेको छ ।

मगर समुदायहरुको आफ्नै पहिचान संरक्षणको लागि मगर संग्रहालय निर्माण गरिने र मगर समुदायको कला भाषा संस्कृती, आफ्नै पहिचान, संरक्षण, प्रर्वधन र विकासका लागि आवश्यक कार्यक्रम सञ्चालन गरिने एमाले कपुरकोटको संकल्प छ ।

एमाले सल्यानका उपाध्यक्ष तथा कपुरकोट गाउँपालिकाका अध्यक्ष पदका उम्मेद्वार भिम बहादुर सेनले सोमबार मनोनयन दर्ता अघि संकल्प पत्र सार्वजनिक गरेका हुन ।

२०७४ को स्थानीय तह निर्वाचनमा आफ्नो पार्टीले कपुरकोट गाउँपालिकाको नेतृत्व गर्ने अवसर पाएको र कपुरकोट गाउँपालिकामा विकासको जग बसालेर समृद्धिको मार्ग र चौतर्फि विकासका आधारहरु तयार गरेको एमालेले जनाएको छ । पूर्वाधार विकास संगै सुशासन, आधारभूत गुणस्तरीय जीवन, सामाजिक, आर्थिक स्तर, खुसीपन तथा वातावरण लगाएतका धेरै क्षेत्रमा एमाले नेतृत्वको सरकारले गरेका प्रयास र उपलब्धीलाई संस्थागत गर्दै दिगो विकासको लक्ष्यलाई पुरा गर्न स्पष्ट बहुमत सहित फेरी पनि नेकपा (एमाले) लाई विजयी बनाउन अनुरोध गरिएको छ ।

गाउँपालिकाका माध्यमिक विद्यालयहरुमा स्कुल बस सञ्चालन गर्ने, दुर्गम र पिछडिएका बस्तिका बालबालिकालाई शिक्षाको पहुँचमा ल्याउन गाउँपालिकामा एउटा आवासीय विद्यालयको व्यवस्था गर्ने, कपुरकोट गाउँपालिकामा निर्माणाधिन १५ सैयाको अस्पताल निर्माण कार्य पुरा गरी चिकित्सक सहित गुणस्तरिय स्वास्थ्य सेवा प्रदान गर्ने एमाले कपुरकोटको प्रतिवद्धता छ ।

खानेपानी, सरसफाई, विद्युतीकरण, उर्जा तथा सिंचाई क्षेत्रको विकासको लागि पनि एमालेले विभिन्न प्रतिवद्धता जनाएको छ ।

एमाले नेतृत्वको कपुरकोट गाउँपालिकाले विगत ५ वर्षको अवधिमा महत्वपूर्ण लिफ्टिङ सिस्टमका खानेपानी योजनाहरु सम्पन्न गरेको कतिपय योजनाहरु सञ्चालन कै क्रममा रहेको उल्लेख गर्दै १३६ वटा भन्दा बढि खानेपानी योजना मार्फत् नागरिकलाई खानेपानीको पहँुचमा पुर्याएको भन्दै थप प्रभावकारी योजना सञ्चालन गर्ने संकल्प गरेको छ ।

यस्तै सडक तथा यातायात, कृषि,पशुपन्छी विकास र आवास व्यवस्थापन संगै पर्यटन, कला संस्कृती र परम्परा एवम् सहकारी क्षेत्रको विकासका लागि एमाले कपुरकोटले विभिन्न संकल्प गरेको छ ।

गाउँपालिकाको केन्द्रमा कवर्ड हल र ६ वटै वडामा खेल मैदान निर्माण, युवाहरुको क्षमता विकास र उनीहरुको अर्थपूर्ण परिचालन, जेष्ठ नागरिक, बालबालिका, अपाङ्गता भएका, अशक्त र पछाडि परेका वर्ग तथा समुदायको उत्थान तथा सामाजिक सुरक्षाका लागि प्रतिबद्धता जनाइएको छ । यसका साथै महिला समानता र शशक्तिकरण, गरिबी निवारण तथा रोजगार, वन, वातावरण र स्थानीय जोखिम व्यवस्थापन, स्थानीय श्रोत साधन र राजस्व परिचालन एवम् न्यायीक समिति र मेलमिलापका विषयलाई पनि विभिन्न प्रतिवद्धता सहित एमालेले संकल्प पत्रमा समेटेको छ ।

भर्खरै प्रकाशित

ट्रेन्डिङ न्युज