April 19, 2024, Friday
२०८१ बैशाख ७, शुक्रबार
राजेन्द्र लिङ्देल : जस्लाई माओवादीले मोसो दले, घरमा आगो लगाइदिए

राजेन्द्र लिङ्देल : जस्लाई माओवादीले मोसो दले, घरमा आगो लगाइदिए

मंसिर १९, झापा । २०७४ सालको संघीय संसदको निर्वाचनमा झापाको क्षेत्र नं ३ मा नेपाली कांग्रेसका नेता कृष्णप्रसाद सिटौलालाई पराजित गरेका राजेन्द्र लिङ्देन संसद्मा सांसदको रूपमा उपस्थित भएपछि धेरैले ‘अब उनको रोल कस्तो हुने हो’ भन्दै चर्चा गरे।

एमालेको समर्थनमा लिङ्देन प्रतिनिधि सभा सदस्य निर्वाचित भएका हुन्। झापा ३ मा आफ्नो उम्मेदवार नउठाएर एमालेले लिङ्देनलाई सहयोग गरेको थियो। बदलामा राप्रपाले एमाले अध्यक्ष केपी शर्मा ओलीलाई झापा ५ मा सहयोग गरेको थियो।

लिङ्देन राप्रपाका एकमात्र निर्वाचित सांसद हुन्। उनी राजाको प्रत्यक्ष शासनकालमा २०६१ सालमा झापाको जिविस सभापति नियुक्त भएका थिए। उनी माओवादीको विरोध अवरोध र आक्रमणकाबीच पनि राजतन्त्रको पक्षमा निरन्तर उभिँदै आएका नेता हुन्। झापाको हल्दीबारीमा रहेको उनको घरमा आगजनी गरियो भने उनलाई भौतिक आक्रमण पनि गरियो।

२०६२/६३ को आन्दोलनका बेला झापाको बिर्तामोडमा माओवादीले कालोमोसो दले। घरमा आगो लगाइदिएपछि उनी त्यहाँबाट बिर्तामोडमा विस्थापित भए। उनले निकै वर्ष झापाको भद्रपुरबाट धनकुटासम्म गाडी चलाए। आफ्नै गाडी किनेर उनी आफैं चलाउँथे।

अहिले लिङ्देन बिर्तामोडको घर बेचेर झापाको हल्दिबारी गाउँपालिका गोल्धापमा रहेको पैतृक र माओवादीले आगजनी गरेको घर मर्मत गरेर उतै फर्किएका छन्।

लिङ्देनको जन्म वि.सं. २०२२ भदौ २२ गते ताप्लेजुङको ढुङ्गेसाँघुमा भएको थियो। प्रहरी सेवामा रहेका उनका बाबुको जागिर झापामा भएकाले ढुङ्गेसाँघुमा जन्मेपनि उनको बाल्यकाल भने झापामा बित्यो। राजनीति शास्त्र र इतिहासमा स्नातकोत्तर गरेका उनी राष्ट्रवादी स्वतन्त्र विद्यार्थी मण्डलमा २०३६ सालमा आबद्ध भएका थिए।

२०४६ सालमा लिङ्देनको टोलीमाथि क्याम्पसका विद्यार्थी राम थापाको हत्या गरेको आरोप लागेको थियो। २०४९ सालमा राप्रपाको विद्यार्थी संगठन निर्माण हुँदा उनी उक्त संगठनको केन्द्रीय अध्यक्ष भए।

२०४९ सालको स्थानीय निर्वाचनमा झापाको गोलधापमा वडाध्यक्ष निर्वाचित भए। अर्को ०५४ सालको स्थानीय निर्वाचनमा पनि वडाध्यक्षमा उनी निर्वाचित भएका थिए।

२०६६ सालमा उनी राप्रपा नेपालको केन्द्रीय सदस्य भए। कमल थापाले नेतृत्व गरेको राष्ट्रवादी स्वतन्त्र विद्यार्थी मण्डलबाट राजनीति सुरु गरेका लिङ्देनलाई ०६६ सालमा थापाको नेतृत्वकै राप्रपा नेपालले केन्द्रीय सदस्य बनाएको हो। २०७० मा लिङ्देन राप्रपाको महामन्त्री भए। अहिले आएर राप्रपाको एकता महाधिवेशनमा अध्यक्षका अर्का प्रत्यासी कमल थापालाई पराजित गरेर उनी पार्टीको अध्यक्ष भएका हुन।

भर्खरै प्रकाशित

ट्रेन्डिङ न्युज