माधव पक्षिय नेताहरूको कारबाही फुकाउने बारे एमालेमा छलफल, दुवै पक्ष सहमतिनजिक
वैशाख २४, काठ्मान्डौं । नेकपा एमालेमा अध्यक्ष केपी शर्मा ओली पक्षीय स्थायी कमिटी सदस्यहरुको बैठकमा वरिष्ठ नेता माधवकुमार नेपालसहित चार जनालाई गरिएको कारबाही फिर्ता लिनेबारे छलफल भएको छ ।
प्रधानमन्त्रीसमेत रहेका अध्यक्ष ओलीले बिहीबार विहान बोलाएको आकस्मिक स्थायी कमिटी बैठकमा कारबाही फिर्ता लिनेबारे छलफल भएको हो । ‘थप छलफल गरेर मात्रै निर्णय लिने भन्ने भएको छ’, एक नेताले बताएका थिए ।
अध्यक्ष ओलीले पार्टीमा समानान्तर गतिविधि गरेको भन्दै वरिष्ठ नेता नेपाल, उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई ६ महिना पार्टीबाट निष्काशन गरिएको पत्र पठाएका थिए ।
तर विश्वासको मत लिने मिति नजिकिँदै जाँदा प्रधानमन्त्री तथा एमाले अध्यक्ष केपी ओलीले नेता माधव नेपाल र झलनाथ खनाल पक्षका नेताहरूसँग संवाद बढाएका छन् ।
ओलीले बिहीबार राति माधव नेपालसँग टेलिफोनमा कुरा गर्दै तिक्तता घटाउने उपायहरूबारे परामर्श गरेका थिए । माधव नेपाल निकट एक नेताका अनुसार खनाल नेपाल पक्षका नेताहरूमाथि चलाएको अनुशासनको कारबाही फुकुवा गर्न ओली तयार देखिएका छन् । उनले एकलाैटी थपेका पार्टी पदाधिकारी र सदस्य फिर्ता लिन माधव पक्षले राखेकाे माग सम्बाेधन गर्न भने उनी अहिलेसम्म तयार देखिएका छैनन् ।
ओलीले फोन गर्नुअघि राष्ट्रपति विद्या भण्डारीले शीतलनिवासमा नेपालसँग १ घन्टा लामो कुराकानी गरेकी थिइन् । विगतदेखि नै आफू सम्बद्ध रहेको पार्टीको आन्तरिक राजनीतिमा कुनै न कुनै भूमिकामा देखिँदै आएकी भण्डारीले नेपाललाई वैशाख २७ गते संसदमा विश्वासको मत दिन आग्रह गरेको नेपालनिकट ती नेताले बताए । नेपालले त्यसका लागि ओली २०७५ जेठ २ को अवस्थामा फर्कन तयार हुनुपर्ने सर्त राखेका थिए ।
त्यसपछि शीतलनिवासले ओलीसँग परामर्श गरेको, त्यसपछि ओलीले माधव नेपाललाई फोन गरेको उच्च स्रोत बताउँछ । माधव पक्षले लुम्बिनी, कर्णालीमा झैँ फ्लाेर क्रस गर्ने संस्थापन पक्षकाे डर छ ।
ओलीले आजै बालुवाटारमा आफू निकटस्थको अनौपचारिक बैठक डाकेका छन् । ओलीनिकट एक नेताले नेपाल पक्षमाथिको कारबाही फुकाउने एजेन्डाका लागि त्यो बैठक डाकिएको खुलाए ।
एमाले संसदीय दलका उपनेता सुवास नेम्बाङसँग यसबारे जिज्ञासा राख्दा उनले सहमतिका लागि विभिन्न विकल्पहरूमाथि छलफल भइरहेको खुलाए । उनले यीमध्ये एउटा सम्भावना कारबाही फुकुवाकाे पनि हुन सक्ने संकेत गरे । ‘त्यसका लागि दुवै पक्षले आफ्ना कुराहरू खुला ढंगले राख्न तयार हुनुपर्छ, त्यसपछि एउटा परिस्थिति पक्कै बन्छ,’ उनले भने ।
विश्वासको मत लिन ओली संसद जानुअगाडि यो काम भइसक्ने उनीनिकट नेताहरूको दाबी छ ।
विगतकाे नेकपाकालीन विवादहरूलाई अब इस्यु नबनाउन ओलीलाई निकटस्थहरूले सुझाएका छन् । ओलीले कारबाही फुकुवा गरे माधव पक्ष सहमतिमा बाधक नबन्ने ती नेताले ठाेकुवा गरे । ‘अहिलेसम्मकाे कुराकानी त्यसैतर्फ उन्मुख छ, सायद भरेसम्ममा देखिने गरी प्रगति हुन्छ,’ ती नेताले भने ।
नेम्बाङले भने कदाचित् विश्वासको मत पाउने अवस्था नआए प्रधानमन्त्री संविधानबमोजिम नै जाने दाबी गरे । ‘त्यसमा अन्यथा शंका गर्नुपर्ने, सोच्नुपर्ने कुनै कारण छैन,’ उनले भने ।
माधव नेपाल पक्षका नेताहरूले पार्टी विभाजन रोक्न सक्रियता बढाएका छन् । बुधबार, बिहीबार र अहिले शुक्रबार बिहान विभिन्न नेताहरूबीच कुराकानी चलिरहेको छ ।
प्रतिकृया दिनुहोस्