छत्रेश्वरी गाउँपालिका विरुद्धको रिट निवेदन उच्च अदालत सुर्खेत द्वारा खारेज

चैत १९, सल्यान । छत्रेश्वरी गाउँपालिका बिरुद्धको मुद्दामा उच्च अदालत सुर्खेतले वुधबार फैसला गरेको छ । दमाचौर खानेपानी योजना बाट स्थानियलाई बाधा पुग्ने भन्दै उच्च अदालत सुर्खेतमा दर्ता गरेको रिट निवेदन खारेज गर्दै अदालतले फैसला गरेको हो ।

चैत १८ गते उच्च अदालतका न्यायधिश द्वय राजेन्द्र सुवेदी र राजेन्द्र खरेलको संयुक्त इजलाशले रिट निवेदन खारेज गरेको गाउँपालिकाका कानुनी सल्लाहकार डम्बर ओलीले बताएका छन ।

वडा नम्बर १ दमाचौरमा खानेपानी आपूर्तिको लागि खानेपानी योजना कार्यान्वयन गर्ने क्रममा स्थानीय दिलमान चन्द लगायत ९ जनाले गाउँपालिका अध्यक्ष सन्तोष केसी, गाउँपालिकाका प्रमुख प्रशासकीय अधिकृत खिम बहादुर खड्का, वडा अध्यक्ष नेव बहादुर शाहका विरुद्ध रिट हालेका थिए । यस भन्दा अगाडि उच्च अदालतले अन्तरिम आदेश जारी गरेको थियो ।

खानेपानी योजनाको टड्कारो समस्या भएको दमाचौरमा खानेपानी आपुर्ती गर्नका लागि १ करोड ६५ लाख रकम विनियोजन गरिएको थियो । अदालतको फैसला आयोजना अघि बढाउने बाटो खुलेको छ । सोही आयोजना सङ्गै बजेट विनियोजन गरिएको लान्ती खानेपानी योजनाको शिलान्यास भैसकेको छ भने दमाचौरको योजना मुद्दाकै कारण रोकिएको थियो ।

स्थानियहरु नै दिलमान चन्द लगायतले हालेको मुद्दाका विरुद्ध थिए । उच्च अदालतको यो फैसलाले योजना कार्यान्वयन गर्न बाटो खोलेको र अब छिट्टै दमाचौरमा खानेपानी समस्या समाधान हुने गाउँपालिका अध्यक्ष सन्तोस केसिले बताएका छन ।