July 15, 2024, Monday
२०८१ असार ३२, सोमबार
रुकुम पश्चिममा राहत बोकेको ट्याक्टर दुर्घटना : श्रीमान श्रीमति सहित ५ को मृत्यु

रुकुम पश्चिममा राहत बोकेको ट्याक्टर दुर्घटना : श्रीमान श्रीमति सहित ५ को मृत्यु

रुकुम पश्चिम ।

रुकुम पश्चिमको आठबीसकोट नगरपालिका १० मा ट्याक्टर दुर्घटना हुँदा पाँच जनाको घटनास्थलमै मृत्य भएको छ । दुर्घटनामा परेर नौ जना घाईते भएका छन् ।

जिल्ला प्रहरी कार्यालयका प्रहरी निरीक्षक धर्मेन्द्र खड्काका अनुसार बुधबार राति करिब सवा दश बजे भूकम्प पीडितहरुको अस्थायी टहरा निर्माणको लागि जस्तापाता र केहि राहतका सामान बोकेर आठबीसकोट नगरपालिका ९ राडिबाट वडानम्वर ८ को घर्तीगाउँतर्फ जाँदै गरेको रा १ त १४ नम्वरको ट्याक्टर वडा नम्वर १० को तिरिकोट भन्ने ठाउँमा दुर्घटना भएको हो ।

दुर्घटनामा परेर पाँच जनाको घटनास्थलमै मृत्यु भएको प्रहरी निरीक्षक खड्काले जानकारी दिनुभयो । मृत्युहुनेहरुमा आठबीसकोट नगरपालिका वडा नम्वर १० का ४६ वर्षिय लोकबहादुर शाही र उहाँको ४२ बर्षिया श्रीमती चुकी शाही, सोहि गाउँका ५२ बर्षिय भर्दर सार्की, वडा नम्वर ८ बस्ने ४८ बर्षिय धनराम सार्की र ४७ बर्षिय निर्मला सार्की रहेका छन् । मृतकहरुको शव राति ११ बजे आठबीसकोट नगर अस्पतालमा ल्याईएको छ ।

दुर्घटनामा परेर नौ जना घाईते भएका छन् । घाईतेहुनेहरुमा आठबीसकोट नगरपालिका १० निवासी ३८ वर्षिय रमेश सार्की, वडा नम्वर ८ निवासी ४१ वर्षिय खड्क बहादुर पुन, १४ वर्षिय दलबहादुर पुन, ४५ वर्षिय कुमार घर्ती, ३४ बर्षिया रमा गुरुङ सार्की, ५१ बर्षिय जगबिर सार्की रहनुभएको छ । त्यसैगरी वडा नम्वर ८ कै ३६ वर्षिय जयबहादुर घर्ती, ५८ बर्षिय मने सार्की र ४२ बर्षिय मदन पुन दुर्घटनामा परेर घाईते हुनुभएको छ ।

घाईते सबैको अहिले आठबीसकोट नगर अस्पतालमा उपचार भईरहेको छ । घाईते मध्य तीन जनाको अवस्था गम्भिर रहेको अस्पतालले जनाएको छ ।

घुम्ती मोड्ने क्रममा सडकबाट करिब ३० मिटर तल खसेर ट्याक्टर दुर्घटना भएको बताईएको छ । प्रहरीले ट्याक्टर चालक आठबीसकोट नगरपालिका ९ निवासी २१ बर्षिय गोपाल बिकलाई नियन्त्रणमा लिएको जनाएको छ ।

भर्खरै प्रकाशित

ट्रेन्डिङ न्युज