‘सबै डाँकूहरु वाल्मिकी नहुँदा रहेछन’

जेठ ३०, पोखरा । गण्डकीका निवर्तमान मुख्यमन्त्री पृथ्वीसुब्बा गुरुङले स्वतन्त्र सांसद तथा मन्त्री राजिब गुरुङ उर्फ दिपक मनाङे प्रती कटाक्ष गरेका छन ।

मनाङे प्रती कटाक्ष गर्दै उनले सबै डाँकूहरु वाल्मिकी नहुँदा रहेछन् भन्दै टिप्पणी गरेका छन । आफैंले सहयोग गरेर राजनीतिमा ल्याएको राजीव गुरुङ ‘दीपक मनाङे’ले आफूलाई धोका दिएको निवर्तमान मुख्यमन्त्री पृथ्वीसुब्बा गुरुङले बताएका छन् ।

आइतबार आफ्नै निवासमा पत्रकारसँग कुरा गर्दै नेकपा एमाले संसदीय दलका नेता गुरुङले मनाङेले आफूलाई ‘धोका’ दिएको दिएको बताएका हुन् । गुरुङलाई आफूले चुनाव जिताएको, प्रदेशसभा सदस्यको सपथ दिलाउन भूमिका खेलेको भन्दै उनले भने, ‘सबै छोड्छु, राजनीति र समाजसेवा गर्छु, सुध्रिन्छु भनेपछि मैले नै सघाएको हो । तर, सबै डाँकूहरु वाल्मिकी नहुँदा रहेछन् ।’

गुरुङले मनाङेलाई १६ वैशाखमा युवा तथा खेलकुदमन्त्री पनि बनाएका थिए । तर पछिल्लो पटक उनले कित्ता फेरेर विपक्षी तिर लागेपछि वैकल्पिक सरकार बनेको छ ।

निवर्तमान मुख्यमन्त्री गुरुङले आफूलाई यो भन्दा ठूलो धोका अरु नहुने बताए । रुपान्तरण हुने अवसर हो भन्ने ग्रहण नगरेकाहरुले यसरी धोका दिने भन्दै उनले भने, ‘धतुरोको बोट आँगनमा रोपेर अमृत फल्दैन भनेको यही हो ।’

आफूले चाहेको भए मनाङेको सांसद पद जाने भएपनि त्यसो नगरेको समेत उनले बताए । एउटा स्वतन्त्र सांसद कुनै अर्को संसदीय दलमा प्रवेश गरेर फेरि स्वतन्त्र हुन नपाइने भन्दै उनले भने, ‘यति सुविधा दिउँ न भनेर दिएको मात्र हो ।’