दिपक मनाङेलाई बाबुरामले गायब पारेको आरोप, सुर्य थापाले गरे- तस्बिर सार्वजनिक

नयाँ दृष्टि
२०७८ जेष्ठ २८

जेठ २८, पोखरा । गण्डकी प्रदेश सभामा मुख्यमन्त्री पृथ्वीसुब्बा गुरुङले विश्वासको मत लिने बेला संसदमा अनुपस्थित भएका उनकै सरकारका मन्त्री दिपक मनाङेलाई जसपा संघीय परिषद अध्यक्ष डा. बाबुराम भट्टराईले गायब पारेको आरोप लागेको छ ।

प्रधानमन्त्रीका प्रेस सल्लाहकार सुर्य थापाले भट्टराईलाई यस्तो आरोप लगाएका हुन ।

मुख्यमन्त्री ले विस्वासको मत लिनेबेला उनकै सरकारमा युवा तथा खेलकुद मन्त्री रहेका राजीव गुरुङ उर्फ दीपक मनाङे सम्पर्कविहीन भएका थिए । उसो त उनले मतदानको पूर्वसन्ध्यामा बुधबार साँझ नै आफू विपक्षी गठबन्धनको समर्थनमा रहेको बताइसकेका थिए।

नभन्दै भोलिपल्ट सांसद मनाङे प्रदेश सभाको बैठकमै उपस्थित भएनन्। उनले मत दिएका भए पनि मुख्यमन्त्री गुरुङले बहुमत त ल्याउँथेनन्। आफ्नो पार्टी एमालेका २७ सांसदले मात्र उनलाई मत दिए र विश्वासको मतमा पराजित हुँदै अहिले उनी पदबाट हटेका छन्।

यसपछि त्यहाँ नयाँ सरकारको गठन प्रक्रिया अघि बढेको छ भने कांग्रेसको नेतृत्वमा विपक्षीले मुख्यमन्त्रीको दाबी पनि पेस गरिसकेको छ।

यहीबीच प्रधानमन्त्री केपी शर्मा ओलीका प्रेस सल्लाहकार सूर्य थापाले पूर्वप्रधानमन्त्री एवं जनता समाजवादी पार्टीका संघीय परिषद् अध्यक्ष डा. बाबुराम भट्टराई र सांसद मनाङे सँगै रहेको तस्बिर सार्वजनिक गरेका हुन्।