सल्यानमा चट्याङ लागेर प्रधानाध्यापकको मृत्यु

नयाँ दृष्टि
२०८१ भाद्र १०

भदौ १०,सल्यान ।

सल्यानमा चट्याङ लागेर एक पुरुषको मृत्यु भएको छ । जिल्लाको कालिमाटी गाउँपालिका – १ लक्ष्मीपुर सातलखोला निवासी ५६ वर्षीय दल बहादुर कार्कीको आज दिउँसो चट्याङ लागेर मृत्यु भएको जिल्ला प्रहरी कार्यालय सल्यानले जनाएको छ ।

उनी कालिदेवी प्राथमिक विद्यालय सातलखोलाका प्रधानाध्यापक समेत रहेको वडा अध्यक्ष रविलाल बस्नेतले बताउनु भयो ।
सार्वजनिक विदाको दिन घर नजिकै गोठालो गएका कार्कीलाई चट्याङले हानेको हो । चट्याङ लागेर गम्भीर घाइते कार्कीलाई उपचारका लागि सल्यान जिल्ला अस्पतालमा ल्याउदा डाक्टरले मृत घोषणा गरेको जिल्ला प्रहरी कार्यालय सल्यानका सूचना अधिकारी प्रहरी निरीक्षक रेशम बहादुर खत्रीले जानकारी दिनु भयो । कार्कीको शव पोष्टमार्टमका लागि सल्यान जिल्ला अस्पतालमा राखिएको छ ।